07/Dec/2024
News Viewed 59 times
لاہور (پاکستان) - سابق وزیراعظم عمران خان کی بہن علیمہ خان نے انکشاف کیا ہے کہ حکومت نے بیرسٹر گوہر سے درخواست کی کہ سنگجانی میں مذاکرات کریں تو عمران خان کو رہا کیا جا سکتا ہے۔ میڈیا سے گفتگو کرتے
ہوئے علیمہ خان نے کہا کہ ان کے خلاف جاری مقدمات میں کئی بے ضابطگیاں ہیں، خاص طور پر جناح ہاؤس کیس کی تحقیقات میں پیش رفت نہیں ہو رہی۔
انہوں نے کہا کہ "آج تین چار مقدمات کی سماعت تھی لیکن ٹرائل آگے نہیں بڑھ رہا۔ تفتیشی افسران کی عدم دلچسپی کی وجہ سے کیسز التوا کا شکار ہیں، اور پراسیکیوشن کے پاس واضح شواہد موجود نہیں ہیں۔
علیمہ خان کا مزید کہنا تھا کہ "نو مئی کے واقعات کو بنیاد بنا کر لوگوں کی زندگیاں متاثر کی جا رہی ہیں، جبکہ عدالت کو بھی احساس ہوگا کہ وقت ضائع کیا جا رہا ہے۔ انصاف کا نظام مذاق بن چکا ہے، اور ہمیں عمران خان کی قیادت کی اہمیت کو سمجھنا ہوگا۔"
دوران سماعت انسداد دہشت گردی عدالت نے جناح ہاؤس جلاؤ گھیراؤ کیس میں 18 جنوری تک ضمانت میں توسیع کی اور پولیس سے مکمل تفتیشی رپورٹ طلب کی۔ علیمہ خان نے عدالت سے سوال کیا کہ "ہم جیل میں ہونے کے باوجود مقدمات میں کیسے نامزد ہو گئے؟" جس پر عدالت نے تفتیشی افسر سے وضاحت طلب کی۔
جج نے پولیس کو وارننگ دیتے ہوئے کہا، "اگر تفتیش مکمل نہ ہوئی تو کارروائی ہوگی۔" اس دوران کئی افراد کی ضمانتیں منظور کی گئیں اور کئی بے گناہ افراد کو رہا کیا گیا۔
.jpg)
